डा. उपेन्द्र देवकोटालाई उपचार कक्षवाट पुर्ख्यौली घर पुर्‍याएर फर्काइयो

ZEN Travels

काठमाडौं।

वरिष्ठ न्यूरोसर्जन डा. उपेन्द्र देवकोटालाई उपचाररत् अवस्थामै गृहजिल्ला गोरखास्थित पुर्ख्यौली घर पुर्‍याएर काठमाडौं फर्काइएको छ ।

उनलाई शनिबार हेलिकोप्टरमार्फत् आँपपिपल, पण्डितगाउँस्थित जन्मघर लगिएको हो ।

डा. देवकोटाले आफू जन्मेको गाउँ पुग्ने र सिस्नेधाराको पानी पिउने रहर गरेका थिए ।

शनिबार दिउँसो २ बजेर १० मिनेटमा डा. उपेन्द्र देवकोटालाई लिएर हेलिकोप्टर गोरखाको आँपपिपलतर्फ उडेको थियो । त्यहाँ घरनजिकै हेलिप्याड बनाइएको थियो ।

डा. देवकोटा, उपचारमा संलग्न चिकित्सकको टोली र आफन्तजन बोकेर दुईओटा हेलिकोप्टर गोरखा गएको थियो ।

डा. देवकोटालाई घरमा लगेर पिँढीमा राखेलगत्तै घरनजिकै रहेको सिस्नेधाराको पानी खुवाइएको थियो ।

पुख्र्याैली घर पुग्दा देवकोटा खुसी देखिएपनि आफन्तहरुसँग भने उनको दोहोरो कुराकानी भएन । उनलाई हेर्न ठूलो संख्यामा गाउँलेलगायत शुभेच्छुकहरुको भीड लागेको थियो ।

यसअघि, काठमाडौंबाट उनलाई लिएर उडेलगत्तै हुरी र झरीका कारण हेलिकोप्टर फेरि अस्पालत परिसरमै अवतरण गराउनुपरेको थियो ।

१५ मिनेटजति रोकिएपछि फेरि हेलिकोप्टर गोरखाका लागि उडेको थियो ।

जन्मघर गएर सिस्नेधाराको पानी खान मन गरेपछि डा. देवकाटालाई पालुङटार लगिएको अस्पतालका प्रशासन प्रमुख वसन्त देवकोटाले जानकारी दिए ।

यसअघि, गम्भीर अवस्थामै सघन उपचारकक्षमा राखेर उपचार भइरहे पनि अनेक अफवाह फैलिएपछि शुभचिन्तकहरुकामाझ उनलाई सार्वजनिक पनि गरिएको थियो ।

पित्तथैलीको क्यान्सरबाट पीडित देवकोटा गत वैशाखदेखि न्यूरो अस्पताल बाँसबारीमा बसेर उपचार गराइरहेका छन् ।

त्यसअघि, उनको बेलायतको किंग्स कलेज हस्पिटलमा उपचार भएको थियो । पाँच महिना लामो उपचारपछि पनि स्वास्थ्यमा सुधार नआएपछि गत वैशाख १८ गते देवकोटालाई नेपाल ल्याएर बाँसबारीस्थित न्यूरो अस्पतालमा भर्ना गरिएको थियो ।

यसैबीच, शनिबारै नेप्लिज न्यूरो सर्जन सोसाइटीले मानार्थ अध्यक्ष उपाधिबाट डा. देवकोटालाई सम्मान गरेको छ । अस्पतालमै पुगेर सोसाइटीले मानार्थ अध्यक्षको प्रमाणपत्र प्रदान गरेको हो ।

सोसाइटीका अध्यक्ष प्रा. डा. मोहनराज शर्माले अस्पतालको आइसीयुमै पुगी डा. देवकोटालाई मानार्थ अध्यक्षको उपाधि हस्तान्तरण गरेको जानकारी दिए ।

त्यसक्रममा सामान्य दोहोरो कुराकानी गरिएको शर्माले जानकारी गराए ।

पलपलमा अपडेट थाहा पाउन तल लाईक गर्नुहोला

यसमा तपाइको प्रतिक्रिया लेख्नुहोला