कांग्रेस विधानमा महाधिवेशन र क्षेत्रीय प्रतिनिधि स्वतः बन्ने प्रावधान नहटाइने

ZEN Travels

काठमाडौँ —

कांग्रेस केन्द्रीय कार्यसमितिले स्वत: महाधिवेशन र क्षेत्रीय प्रतिनिधि बन्ने प्रावधान विधानबाट नहटाउने भएको छ । डेढ महिनाअघि सम्पन्न महासमिति बैठकमा सभापति शेरबहादुर देउवा र वरिष्ठ नेता रामचन्द्र पौडेलले केन्द्रीय पदाधिकारी र सदस्य स्वत: महाधिवेशन तथा क्षेत्रीय प्रतिनिधि बन्ने प्रावधान हटाउने प्रतिबद्धता जनाएका थिए ।

अधिकांश केन्द्रीय सदस्यले तलैबाट निर्वाचित भएर आउनुपर्ने प्रावधानलाई लिएर असुरक्षा प्रकट गर्न थालेपछि सभापति देउवा पछि हटेका हुन्।
विधानमा पदाधिकारी र केन्द्रीय सदस्य स्वत: महाधिवेशन प्रतिनिधि हुने व्यवस्था छ। पूर्वपदाधिकारी तथा सदस्य, जिल्ला सभापति, क्षेत्रीय सभापति, संघीय संसदका सदस्य तथा उम्मेदवार, प्रदेशसभाका सांसद र सांसदका उम्मेदवारसम्मले एक अवधिका लागि स्वत: क्षेत्रीय प्रतिनिधि हुन पाउँछन्।
स्वत: प्रतिनिधिको मापदण्डभित्र पर्ने नेता–कार्यकर्ताको पंक्तिमा देउवापक्षीय बढी छन्। संस्थापन पक्षका अधिकांश केन्द्रीय सदस्यले तलैबाट निर्वाचित भएर आउनुपर्ने प्रावधान राख्दा १४ औं महाधिवेशनमा असर पर्ने भन्दै ‘कन्भिन्स’ गराएपछि देउवा पछि हटेको एक केन्द्रीय सदस्यले बताए। वरिष्ठ नेता पौडेल पक्षका अधिकांश सदस्य पनि यस्तो प्रावधान संशोधन गर्ने पक्षमा छैनन्।
देउवा र पौडेलले केन्द्रीय कार्यसमितिबाट विधानका प्रावधान संशोधन गर्ने वचन दिएपछि मात्रै पुस ८ मा सम्पन्न महासमिति बैठकबाट पार्टीको विधान सर्वसम्मत पारित भएको थियो। स्वत: महाधिवेशन र क्षेत्रीय प्रतिनिधि बन्ने प्रावधान हटाउन ५० भन्दा बढी जिल्ला कार्यसमितिका सभापतिको अगुवाइमा एक तिहाइ महासमिति सदस्यले हस्ताक्षर गरी वैधानिक रूपमै प्रस्ताव दर्ता गराएका थिए। जिल्ला सभापतिहरू यो मुद्दामा एकै ठाउँमा उभिएका थिए।
वरिष्ठ नेता पौडेलले समावेशी र आरक्षण एक पटकका लागि मात्रै पाउने र केन्द्रीय सदस्य तलैबाट निर्वाचित भएर आउनुपर्ने प्रावधान राख्नुपर्ने बताए। ‘सबै निर्वाचनमा जान हुने, केन्द्रीय सदस्यचाहिँ किन नहुने?’ पौडेलले भने, ‘महासमितिको म्यान्डेट मानेर जानुपर्छ।’
केन्द्रीय पदाधिकारी तथा सदस्य तलैबाट निर्वाचित भएर आउनुपर्ने पक्षमा पूर्वमहामन्त्री कृष्णप्रसाद सिटौला खरो रूपमा उभिएका थिए। ‘तपाईंले (सभापति) प्रतिबद्धता जनाउनुभएको छ, महासमितिका सबै साथी त्यसैको पक्षमा थिए/छन्, यो कडाइसाथ लागू गर्नुपर्छ,’ सिटौलाको भनाइ थियो। उनले महासमिति बैठकको मतादेशअनुसार समावेशी र समानुपातिक अवसर एक पटकका लागि मात्रै लिन पाउने व्यवस्था विधानमा राख्न आग्रह गरे। सभापति देउवा र उनी पक्षीय केन्द्रीय सदस्यले यस विषयमा बोलेका छैनन्।
नेविसंघ विघटन गर्ने तयारी:केन्द्रीय कार्यसमिति बैठकले नैनसिंह महर नेतृत्वको नेविसंघको कार्यसमिति विघटन गर्ने तयारी गरेको छ। सभापति देउवा र वरिष्ठ नेता पौडेल महर नेतृत्वको विकल्पमा जान सहमत भएका छन्। पौडेलले संघको वर्तमान नेतृत्वले संगठन बनाउन र अधिवेशन गर्न नसकेको भन्दै विघटनको प्रस्ताव गरेका थिए। उनले विश्वसनीय ढंगको तदर्थ समिति बनाउनुपर्ने बताएका थिए।
उपसभापति विमलेन्द्र निधिले राजनीतिक र वैधानिक रूपले समेत वर्तमान कार्यसमिति राखिराख्नु औचित्य नभएकाले तदर्थ समिति बनाउने पक्षमा मत राखेका थिए। पूर्वमहामन्त्री सिटौला भने विघटनको विपक्षमा छन्। उनले सबै भ्रातृसंस्थालाई अधिवेशन गराउने समय दिनुपर्ने बताए। सभापति देउवाले ६ महिनाभित्र महाधिवेशन गराउने गरी नयाँ नेतृत्वमा तदर्थ समिति बनाउने तयारी अघि बढाएको एक केन्द्रीय सदस्यले बताए।
पौडेलले दोहोर्‍याए महाधिवेशनको तालिकावरिष्ठ नेता पौडेलले २०७६ फागुन ७ मा पार्टी महाधिवेशन गर्ने प्रस्ताव बुधबार पनि दोहोर्‍याएका छन्। देउवाले पनि साढे ५ वर्षभित्र मात्रै महाधिवेशन हुने जवाफ फर्काए। पार्टीको विधानअनुसार आगामी ०७६ फागुनभित्र नियमित महाधिवेशन गराउनुपर्ने हुन्छ। विधानमा थप एक वर्षको समय बढाउन सक्ने प्रावधान छ। संविधानको राजनीतिक दलसम्बन्धी व्यवस्थामा भने साढे ५ वर्षभित्र महाधिवेशन गराउन सक्ने प्रावधान छ। देउवाले संविधानकै व्यवस्था टेकेर साढे ५ वर्षमा महाधिवेशन हुने जवाफ पौडेललाई दिएका हुन्।
‘महाधिवेशन पर सार्ने कुरा भइरहेको छ, ५ वर्षको मात्रै राजनीतिक जीवन हो भने सार्ने कुरा गरौं,’ पौडेलले कान्तिपुरसँग भने, ‘होइन भने समयमै महाधिवेशन हुनुपर्छ, मैले जुन एजेन्डा प्रस्तुत गरेको छु, त्यही एजेन्डा लिएर अघि बढ्नुपर्छ।’
बैठकमा केन्द्रीय सदस्यहरू महेश आचार्य, मीनेन्द्र रिजाल र बालकृष्ण खाँणले समसामयिक विषयमा धारणा राखेका थिए। आचार्यले संसद्मा आउँदै गरेका विधेयकमाथि पार्टीले गम्भीर ध्यान दिन आवश्यक रहेको बताएका थिए। रिजालले शान्ति प्रक्रियासँग सम्बन्धित दुई विधेयकबारे भइरहेको प्रगतिका विषयमा धारणा राखेका थिए। -kantipur

पलपलमा अपडेट थाहा पाउन तल लाईक गर्नुहोला

यसमा तपाइको प्रतिक्रिया लेख्नुहोला