छत्रेश्वरीका महिलालाइ कटाई सिलाइ सीप प्रदान

सल्यानको छत्रेश्वरी गाउँपालिकामा १५ जना महिलाले आधारभुत कटाई सिलाइ सम्बन्धि तीन महिले सीप सिकेका छन् । जिल्लाको छत्रेश्वरी गाउँपालिका वडा नम्बर ५ मा महिलाहरुलाइ आत्मनिर्भर बनाउने उदेश्यले कटाई सिलाइ तालिम प्रदान गरिएको हो । छत्रेश्वरी गाउँपालिका र उद्योग तथा उपभोक्ता हित संरक्षण कार्यालय सल्यानको संयुक्त साझेदारीमा संचालन भएको तीन महिने कटाई सिलाइ तालिमको मंगलबार समापन गरिएको हो ।तालिमका प्रशिक्षार्थीलाई प्रमाणपत्र प्रदान गर्दै गाउँपालिका अध्यक्ष ओज बहादुर बुढाथोकीले सीप सिकेर सोही अनुसारको व्यवसाय संचालन भएमा महिलाहरुको परनिर्भरता हट्ने र घरेलु हिंसामा पनि कमि आउने बिश्वास व्यक्त गर्नुभयो । गाउँपालिकाका प्रवक्ता फौद बहादुर बस्नेत र कार्यपालिका सदस्य तिला घर्तीले कटाई सिलाइको काममा दक्ष बन्न नियमित अभ्यास गर्नुपर्ने सुझाव दिनुभयो ।

तालिमका प्रशिक्षार्थी बिमला बिक र हिमा भण्डारीले आफ्नो अनुभव सुनाउदै तालिममा निकै महत्वपूर्ण सीप सिकेको र कटाइ सिलाइको माध्यमबाट आत्मनिर्भर बन्न सक्ने आंट आएको बताउनुभयो ।

आगामी आर्थिक बर्षमा आधारभुत सीप प्राप्त गरेका प्रशिक्षार्थीहरुलाइ पुनर्ताजगी संगै एड्भान्स तालिम संचालन गरिने उद्योग तथा उपभोक्ता हित संरक्षण कार्यालय सल्यानका निमित्त कार्यालय प्रमुख जनक खड्काको भनाइ छ ।

तालिम समापन कार्यक्रममा वडा सदस्य डुम बहादुर खत्री, गाउँपालिकाका प्रेस सल्लाहकार शंकर केसी, उद्यम बिकास सहजकर्ता निमा बस्नेत, प्रशिक्षक बिमला घर्ती लगायतको सहभागिता थियो । कार्यक्रमको संचालन उद्योग कार्यालयका सुचना अधिकारी ध्रुव बहादुर खत्रीले गर्नुभएको थियो ।