दोस्रो शारदा मेयर new year टि–२० कप क्रिकेट प्रतियोगिता सुरु

सल्यानमा अन्तरपालिका स्तरीय दोस्रो शारदा मेयर टि–२० कप क्रिकेट प्रतियोगिता सुरु भएको छ । आज बाट सल्यान सदरमुकाम खलंगास्थित त्रिभुवन जन माध्यमिक बिद्यालयको खेलमैदानमा सुरु भएको प्रतियोगीताको उद्घघाटन शारदा नगरपालिकासँग भगिनी सम्बन्ध कायम गरेको ललितपुर महानगरपालिकाका प्रमुख चिरिबाबु महर्जनले गर्नुभएको  हो । टि–२० कप क्रिकेट प्रतियोगितामा आठ समूहको सहभागिता रहेको छ । प्रतियोगीतको विजेता टिमले एक लाख रुपैयाँ र उपविजेता टिमले ५० हजार रुपैयाँ पुरस्कार पाउने छन । क्रिकेट प्रतियोगिताको व्यवस्थापन क्रिकेट संघ सल्यानले गरेको छ । प्रतियोगितामा सहभागी ८ वटा पालिकालाई दुई समूहमा विभाजन गरेर आइसिसीको नियमअनुसार लिग चरणमा खेल हुने छ । प्रतियोगिता बैशाख १५ गते सम्म चल्ने छ । यो प्रतियोगिता जिल्लामा क्रिकेटको स्तरलाई अगाडि बढाउन र युवाहरुलाई खेलकूदमा संलग्न गराउन ठूलो अवसर हुने अपेक्षा गरिएको छ । उद्धघाटन कार्यक्रममा बोल्दै ललितपुर महानगरपालिकाका प्रमुख चिरीबाबु महर्जनले खेलकुद क्षेत्रलाई बिकास गर्नको लागि स्थानिय तहले लगानी बढाउनु पर्ने बताउनु भयो । खेलकुद मध्य पनि क्रिकेट क्षेत्रलाई अगाडी बढाउनको लागि आफूले पनि काम गरिरहेको क्रिकेट सबैको चासोको बिषय बन्नुपर्ने बताउनु भयो । शारदा नगरपालिका र ललितपुर महानगपालिका बिच समुधुर सम्बन्ध हुने भन्दै खेलकुद क्षेत्र मात्र नभएर अन्य क्षेत्रमा पनि सहकार्य हुने प्रतिवद्धता जनाउनु भयो । नगरप्रमुख प्रकाश भण्डारीको अध्यक्षतामा भएको कार्यक्रममा स्वागत मन्तव्य उपमेयर सुस्मिता सापकोटाले गर्नुभएको थियो भने कार्यक्रमको सञ्चालन शिक्षा शाखा प्रमुख लिलाधर बबालले गर्नुभएको थियो ।
कार्यक्रममा जिल्ला क्रिकेट संघ  सल्यानका अध्यक्ष सबिन हमाल, नेपाल पत्रकार महासंघ सल्यानका अध्यक्ष डिल्लीराज रावत लगायत बोल्नुभएको थियो ।
आज पहिलो दिन सिद्धकुमाख र शारदा बिच खेल भैरहेको छ । पहिलो खेलमा सिद्धकुमाख गाउँपालिकालाई ३ विकेटले पराजित गर्दै शारदा नगरपालिकाले विजयी सुरुवात गरेको छ ।

टस जितेर पहिले ब्याटिङ गरेको सिद्धकुमाखले १५ ओभरको खेलमा ५ विकेटको क्षतिमा १४६ रन बनाएको थियो । १४७ रनको लक्ष्य पछ्याएर जवाफि ब्याटिङमा उत्रिएको शारदाले १३ ओभर ३ बलमा लक्ष्य भेट्टायो । शारदाले ९ बल बाँकी हुदाँ ७ विकेट गुमाएर १४९ रन बनाएको थियो ।