सल्यान दार्माका महिलालाई दुना टपरी बनाउने तालिम प्रदान

 सल्यान दार्माका महिलालाई दुना टपरी बनाउने तालिम प्रदान गरिएको छ । दार्मा गाउँपालिका उद्यम विकास शाखाको आयोजनामा पालिका भित्रका १६ जना महिलाहरुलाई दुना टपरि बनाउन सिकाइएको थियो । उनिहरुलाई ५ दिन सम्म दुना टपरि उद्योग तालिम सिकाईको हो । समापन कार्यक्रममा जिल्ला समन्वय समितिका उपप्रमुख असबिर बुढाथोकीले प्रत्येक व्यक्ति उद्यमी नभएसम्म आर्थिक रूपमा समाज कमजोर हुने र परनिर्भर जीवनयापन गर्नुपर्ने धारणा राख्नुभयो । उहाँले ग्रामीण क्षेत्रका महिलाहरू पनि उद्यमी भई आत्मनिर्भर बन्न सक्ने बताउँदै सालको पातबाट दुना–टपरी निर्माण गरेर प्लास्टिक मुक्त समाज निर्माणमा सबै जुट्नुपर्नेमा जोड दिनुभयो। दार्मा गाउँपालिकाका प्रमुख प्रशासकीय अधिकृत रेशम वलीले गाउँमा हुने हरेक बिहे–कार्जे, भोज–भतेर तथा पूजापाठमा दुना–टपरी प्रयोग एवं त्यसमा राखेर खाने परम्परा लोप हुनै लागेकाले प्लाष्टिकजन्य वस्तुले सहरबजार मात्र नभएर गाउँघरसमेत फोहर बनाउनुका साथै वातावरणमा प्रतिकूल असर गरिरहेकाले त्यसलाई विस्थापित गर्न सालको पातबाट दुना–टपरी बनाएर उपयोगमा ल्याउने उद्देश्यले गाउँपालिकाका भित्रका महिलाहरुलाई ५ दिने दुना–टपरी उद्योग तालिम दिइएको बताउनुभयो । प्रशिक्षक रुकमागत खनालले तालिममा ५ दिनको अनुभव सेयर गर्दै दुना–टपरी उत्पादन गाह्रो उद्योग नभएको र महिलाहरूले घरमै बसेर विना लगानी नगद आम्दानी गर्न सकिने उल्लेख गर्नुभयो। दार्मा गाउँपालिका सामाजिक विकास शाखाका संयोजक पुष्पाञ्जली मगरले नयाँ उद्यमी सिर्जना गरी ग्रामीण स्तरका महिलाहरूलाई उत्पादनमा जोड्ने लक्ष्य राखिएको बताउनुभयो।
उहाँले दार्मा गाउँपालिकाको नारा उत्पादनमा वृद्धि, दार्माको समृद्धिू भन्ने बताउँदै, सबैसँग मिलेर यसलाई साकार पार्ने आह्वान गर्नुभयो। कार्यक्रमको सहजिकरण दार्मा गाउँपालिकाका प्रशासन शाखा प्रमुख सुनिल बिसीले गर्नुभएको थियो।