सल्यानको शारदामा आधारभूत सिलाइ कटाइ तालिम सम्पन्न, १७ प्रशिक्षार्थीले लिए प्रमाणपत्र

उद्योग तथा उपभोक्ता हित संरक्षण कार्यालय सल्यानको चालु आर्थिक वर्ष २०८१/८२ को वार्षिक कार्यक्रमअनुसार उद्योग कार्यालय सल्यान र शारदा नगरपालिकाको साझेदारीमा शारदा नगरपालिका-११ मा सञ्चालित आधारभूत सिलाइ कटाइ तालिम सफलतापूर्वक सम्पन्न भएको छ।
तालिमको समापन विशेष कार्यक्रमबीच गरिएको थियो। उद्योग कार्यालय सल्यानका प्रमुख श्यामलाल खरालको अध्यक्षता तथा शारदा नगरपालिकाका उपप्रमुख सुस्मिता सापकोटा को प्रमुख आतिथ्यतामा कार्यक्रम सम्पन्न भयो।
निम कुमारी थापाको प्रशिक्षणमा सञ्चालित ३ महिने उक्त तालिममा शारदा नगरपालिका-१० र ११ का १७ जना प्रशिक्षार्थी सहभागी थिए। तालिमका सहभागीहरूले सिलाइ कटाइसम्बन्धी आधारभूत ज्ञान, आधुनिक मेसिनको प्रयोग, विभिन्न कपडाका डिजाइन तथा ग्राहक आवश्यकताअनुसारको सिलाइ गर्ने सीप हासिल गरेको प्रशिक्षक थापाले जानकारी दिनुभयो ।
तालिममा सहभागी महिलाहरूले सीप सिकेपछि स्वरोजगार बन्ने अवसर प्राप्त भएको अनुभव बाँडे। कतिपयले तालिमपछि आफ्नो व्यवसाय सुरु गर्ने योजना बनाएको बताउनु भयो ।
स्थानीयस्तरमै तालिमको अवसर
कार्यक्रमलाई सम्बोधन गर्दै प्रमुख अतिथि सुस्मिता सापकोटाले स्थानीय तहमा रोजगारी सिर्जना गर्न यस्ता तालिम उपयोगी हुने बताउनु भयो । उहाले महिलाहरूलाई आत्मनिर्भर बनाउने उद्देश्यले आगामी दिनमा पनि यस्ता कार्यक्रम सञ्चालन गरिने उल्लेख गर्नुभयो ।
कार्यक्रमका अध्यक्ष तथा उद्योग कार्यालय सल्यानका प्रमुख श्यामलाल खराल ले तालिमले स्थानीयस्तरमै उद्यमशीलताको विकास गर्न सहयोग पुग्ने बताउनु भयो । उहाँले सहभागी प्रशिक्षार्थीलाई आफ्नो सीपलाई व्यवसायमा रूपान्तरण गर्न आग्रह गर्दै सिलाइ कटाइ व्यवसायले स्वरोजगार सिर्जना गर्न सहयोग पुग्ने विश्वास व्यक्त गर्नुभयो । तालिम समापन कार्यक्रममा सहभागी प्रशिक्षार्थीहरूलाई प्रमाणपत्र वितरण गरिएको थियो।
कार्यक्रममा शारदा नगरपालिका-१० का वडा अध्यक्ष कृष्ण बहादुर बोहरा, वडा नं. ११ का अध्यक्ष राजेश कुमार शर्मा , उद्योग कार्यालयका प्रशासकीय अधिकृत जनक खड्का लगायत उद्योग कार्यालयका प्रतिनिधिहरू, स्थानीय उद्यमी तथा सरोकारवालाहरूको समेत उपस्थिति रहेको थियो। कार्यक्रमको सञ्चालन ध्रुव बहादुर खत्री ले गरेका थिए।