कुलमान हटाउने निर्णयविरुद्ध सल्यानमा बिद्यार्थीको प्रदर्शन

नेपाल विद्युत् प्राधिकरणका कार्यकारी निर्देशक कुलमान घिसिङलाई हटाउने सरकारको निर्णयविरुद्ध मंगलबार बेलुका सल्यानमा प्रदर्शन भएको छ ।
नेकपा माओवादी केन्द्र निकट विद्यार्थी संगठन अनेरास्ववियु क्रान्तिकारीले श्रीनगरमा सरकारले गरेको निर्णयविरुद्ध प्रदर्शन गरेका हुन् ।

यसक्रममा उनीहरूले सरकारविरुद्ध नाराबाजी गर्दै कुलमान हटाउने निर्णय फिर्ता लिन माग गरेका थिए । विच बजारबाट निक्लिएको जुलुस बजार हुँदै उद्योग वाणिज्य संघको अगाडि पुगी कोण सभामा परिणत भएको हो ।
कोणसभालाई संगठनका केन्द्रीय सदस्य तथा जिल्ला इन्चार्ज मनोज बुढा, वाइसिएल नेपालका जिल्ला अध्यक्ष धन बहादुर परियार र संगठनका जिल्ला अध्यक्ष गणेश वलीले सम्बोधन गरेका छन ।
सम्बोधनका क्रममा उनिहरूले सरकारको यो कदम जनविरोधी भन्दै यसले देशलाई घाटा गर्ने बताएका छन । उनिहरूले सरकारले भ्रष्ट, तस्कर, माफियालाई जोगाउन गलत काम गरिरहेको बताएका हुन ।
मन्त्रिपरिषद्को सोमबार बसेको बैठकले नेपाल विद्युत् प्राधिकरणका कार्यकारी निर्देशक घिसिङलाई हटाएर हितेन्द्र देव शाक्यलाई नियुक्त गर्ने निर्णय गरेको थियो । सरकारले गोप्य राखेको निर्णय मन्त्रीले सार्वजनिक गरिदिएपछि यसको चौतर्फी विरोध भइरहेको छ ।