युद्ध पर्यटकीय क्षेत्रमा नेपाली सेनाको निःशुल्क स्वास्थ शिविर

युद्ध पर्यटकीय क्षेत्रमा नेपाली सेनाको निःशुल्क स्वास्थ शिवि
नेपाली सेनाले दुर्गम क्षेत्रमा रहेका नागरिकलाई लक्षित गरी निःशुल्क स्वास्थ्य शिविर बाट सेवा प्रदान गरेको छ। श्री सिद्धिवक्स गण, सिमखर्क ब्यारेकले एक दिने निःशुल्क स्वास्थ्य शिविर आयोजना गरी स्थानीयवासीलाई स्वास्थ्य सेवा उपलब्ध गराएको हो ।
शिविर  जिल्लाको युद्ध पर्यटन क्षेत्र छत्रेश्वरी गाउँपालिका-२ स्थित श्री जनता माध्यमिक विद्यालय बुरासेटाकुरीमा सञ्चालन गरि स्वास्थ्य सेवा दिएपछि स्थानीयलाई राहत भएको छ । श्री सिद्धिवक्स गण सिमखर्कका प्रमुख सेनानी कृष्णचन्द्र ठकुल्लाका अनुसार १९ नम्बर वाहिनी, तुलसीपुर दाङ र श्री सिद्धिवक्स गण, सिमखर्कको संयुक्त आयोजना छत्रेश्वरी गाउँपालिका र छत्रेश्वरी गाउँपालिका वडा न२ सहयोगमा  स्वास्थ्य सेवा प्रदान गरिएको हो।
शिविरमा ज्येष्ठ नागरिक, महिला र बालबालिकालगायत विभिन्न उमेर समूहका व्यक्तिहरूले स्वास्थ्य सेवा प्राप्त गरेका थिए । उहाँका अनुसार शिविरबाट १९० जना महिला र १२० जना पुरुष गरी जम्मा ३१० जना स्थानीय लाभान्वित भएका छन्।
शिविरमा विशेषज्ञ चिकित्सकहरूको टोलीले हाडजोर्नी, स्त्रीरोग, बालरोग, नाक-कान-घाँटी लगायत विभिन्न रोगहरूको उपचार गरेका थिए। साथै, बिरामीहरूको जाँचसँगै औषधि वितरण, ल्याब सेवा तथा मुटुसम्बन्धी इसिजी परीक्षण सेवा समेत प्रदान गरिएको थियो।
उक्त शिविरमा नेपाली सेनाका ७ जना चिकित्सक, जिल्ला स्वास्थ्य चौकी सल्यानका ३ जना तथा छत्रेश्वरी स्वास्थ्य सेवाका ३ जना स्वास्थ्यकर्मीहरूले सेवा प्रदान गरेका थिए।
साथै भलिबल प्रतियोगिता को समेत आयोजना गरिएको थियो भने बुरासे युद्ध पर्यटन क्षेत्र भएकाले युद्धको समयमा भएका बिष्पोटक पदार्थबाट कसरी सुरक्षा अपनाउने भनेर सचेतना कार्यक्रम सन्चालन गरिएको थियो ।
शिविर अवलोकन गर्न तथा स्थानीय नागरिकहरूसँग भेटघाट गरी समस्या बुझ्न १९ नम्बर बाहिनी अड्डा, तुलसीपुर दाङका बाहिनीपति सहायक रथी पदमबहादुर बुढा मगर पनि उपस्थित हुनुभएको थियो ।
नेपाली सेना र नागरिकबीच पारस्परिक सम्बन्ध सुदृढ बनाउने उद्देश्यले दुर्गम क्षेत्रमा स्वास्थ्य सेवा सञ्चालन गरिएको प्रमुख सेनानी ठकुल्लाले जानकारी गराउनुभयो। सेनाको सामाजिक तथा जनहित कार्यअन्तर्गत यो स्वास्थ्य शिविरको आयोजना गरिएको उनले बतानुभयो। यस्तै कार्यक्रममा सहभागी छत्रेश्वरी गाउँपालिकाका अध्यक्ष श्री ओज बहादुर बुढाथोकीलाई वाहिनिपतिले मायाको चिनो प्रदान गरेका थिए । नेपाली सेनाले सञ्चालन गरेका सामाजिक कार्यहरूको सराहना गर्दै अध्यक्ष बुढाथाेकीले आगामी दिनमा पनि यस्ता कार्यक्रमहरू निरन्तर सञ्चालन गर्नुपर्ने आवश्यकतामा जोड दिनुभयो ।।