सल्यानको कपुरकोटमा घरमा आगलागी, साढे तीन लाख बराबरको क्षति

सल्यानको कपुरकोट गाउँपालिका१ चारपालीमा एक घरमा आगलागी हुँदा करिब साढे तीन लाख रुपैयाँ बराबरको क्षति भएको छ।
सोमबार बिहान करिब ८ः५५ बजे ७० वर्षीया हरीकला घर्तीको खरले छाएको, काठ, ढुंगा र माटोले बनेको दुईतले कच्ची घरमा अचानक आगलागी भएको हो।
प्रहरी र स्थानीयवासीको सक्रियतामा आगो बिहान ९ः५० बजे पूर्ण रूपमा नियन्त्रणमा लिइएको थियो ।
जिल्ला प्रहरी कर्यालय सल्यानका अनुसार आगलागीबाट घरभित्र रहेका अन्नपात, लत्ताकपडा, काठ तथा नगद १० हजार रुपैयाँ जलेर नष्ट भएको छ। घटनाबाट करिब ३ लाख ५० हजार रुपैयाँ बराबरको क्षति भएको प्रारम्भिक अनुमान गरिएको सूचना अधिकारी देवराज भट्टराईले जानकारी दिनुभयो । उहाँका अनुसार घटनामा कुनै मानवीय वा चौपाया क्षति भएको छैन। घरमा सासु र बुहारी मात्र बस्दै आएको बताइएको छ। आगलागीको कारण भने हालसम्म खुल्न नसकेको र यसबारे थप अनुसन्धान भइरहेको प्रहरीले जनाएको छ।