मतपत्र छपाइमा ढिलाइले सल्यान कांग्रेसको निर्वाचन मंगलबार हुने

नेपाली कांग्रेसको १५ औं महाधिवेशन अन्तर्गत सल्यानको खलंगास्थित टुँडिखेलमा सोमबार हुने भनिएको प्रदेश सभा र महाधिवेशन प्रतिनिधिको निर्वाचन मंगलबारका लागि सरेको छ। मतपत्र छपाइमा भएको ढिलाईका कारण सोमबारको निर्वाचन स्थगित भएको हो ।

शनिबार तय भएको प्रदेश सभा र महाधिवेशन प्रतिनिधिको निर्वाचन अविरल वर्षाले सोमबार सारिएको थियो । सोमबार बिहानदेखि मतदान हुने तय भएपछि खलंगामा चहलपहल बढेको थियो । सोमबारको मतदान स्थगित भए पनि चहलपहल भने घटेको छैन ।

लगातार वर्षातका कारण तीन दिन विद्युत अवरुद्ध हुँदा मतपत्र छपाईमा ढिलाई भएको र आवश्यक तयारी नपुगेका कारण सोमबार हुने भनिएको निर्वाचन स्थगित गरिएको निर्वाचन अधिकृत धिरेन्द्र सापकोटाले बताउनुभयो । प्रदेश सभा र महाधिवेशन प्रतिनिधिको निर्वाचन तथा मतदान कार्य मंगलबार बिहान ९ बजेदेखि बेलुकी ५ बजेसम्म हुने उनले बताउनुभयो। बत्ती बेलाबेलामा गइरहने र रातिको समयमा मतदान गर्न असहज हुने भएकाले नै सबैको सल्लाह अनुसार सोमबारको कार्यक्रम स्थगित गरिएको उहाँले बताउनु भयो।